Сүүлийн үед Фейсбүүк дээрх луйврын үйлдэл хэрээс хэтэрч байна

Сүүлийн үед хуурамч Фейсбүүк хуудаснууд зүгээр байлгахаа болилоо.

Facebook-н нөгөө алдарт боловсронгуй, хүчирхэг хиймэл оюун ухаан нь хаана ч байгаа юм?. Энэтхэг, Пакистан, Вьетнам зэрэг улсаас луйварчид Facebook-н өөрийнх нь логог ашигласан, тэдний хэрэглэгчдийн үйлчилгээний төв мэтээр нэрлэсэн шинэ хуудас нээж байхад мэдэхгүй байна гэж байх уу? Хуудас нээхээс гадна бизнесийн байгууллагуудын хуудас бүрийг меншн хийсэн пост хийж, мессеж илгээж байхад зогсоож чаддаггүй ээ!? Гайхалтай 😳

Сүүлийн үед иймэрхүү луйварчид ихэвчлэн DM-р мессеж илгээдэг болсон байна билээ, ингэхдээ ямар нэг ноцтой зөрчил гаргасан тул танай хуудсыг хаах гэж байна гэсэн мессежийг илгээдэг. Энэ мессежээ бас яаралтай мэдээллээ баталгаажуулах холбоостой явуулна. Коммент бичих, танай хуудсыг таг хийсэн пост хийх хуучин аргаа ч ашигласан хэвээр байгааг бас анхааруулъя. Бидний хувьд яг ийм пост харсан даруйдаа л репорт, блок хийдэг. Ядаргаатай ч үүнээс өөр арга алга даа 🤦🏼‍♀️

Хэдийгээр бидний зүгээс анхааруулга зөвлөмж байнга бэлтгэж гаргадаг ч маш олон хүн эдгээр луйварчдын гарт өртсөн хэвээр байгаад байна. Үр дагавар нь Facebook хаягаа, бизнесийн хуудсаа алдаж, хаалгаж улмаар луйварчдад сурталчилгааны дансаа ашиглах боломж олгож, банкны данс, картыг чинь ашиглан өндөр дүнтэй сурталчилгаа хийж бөөн төлбөрт унагах боломжийг олгож байна.

Метагийн нөгөө мундаг хиймэл оюун ухаан ийм үйлдлийг зогсоож чадахгүй, бүх юм болоод өнгөрсний дараа нь ч хэрэглэгчийн үйлчилгээний ажилтнууд нь шийдэж чадахгүй байгаа нь бүүр гайхалтай шүү нээрээ.

Тэгэхээр найзууд аа, Фейсбүүк хаягаа, хуудсаа, сурталчилгааны аккаунтаа, карт, дансны мэдээллээ хамгаалах нь биднээс өөрсдөөс маань хамаарах зүйл болоод байна шүү. Янз бүрийн шалтгаанаар танай хуудас хаагдах гэж байна гэсэн мессеж, таг хийсэн постод бүү хуурт.

Google Authenticator, Duo Mobile гэх мэт 2 шатлалт баталгаажуулалт ашигла. Дээр нь бидний яг энэ сэдвээр бэлтгэсэн "Фэйсбүүк хаягаа хакеруудаас хэрхэн хамгаалах вэ? Заавал хийх 10 алхам." нийтлэлийг мөн эргэж нэг хараарай.