2023 он сошиал медиа хааш чиглэж байна?

Шинэ жилийн уур амьсгал нэгэнт оржээ. 2023 он гарахад 15 хоног үлдсэн юм чинь аргагүй биз ээ!

Гэхдээ оны сүүлийн өдрүүдэд маркетерүүд, бизнес эрхлэгчдийн санааг чилээж буй нэг зүйл байгаад байгаа юм шиг. Тэр нь маркетинг үр дүнтэй хийх нь улам л хэцүү болоод байгаа тэр бодит үнэн. Facebook, Instagram-н байнгын өөрчлөлт, TikTok, YouTube гээд олон шинэ сувгууд сурах, ашиглах шаардлага гээд асуудлууд байна шүү бидэнд. Ямартай ч хамгийн эхлээд бидний яг одоо хийх ёстой 5 зүйл байна:1: Энэ жил хийсэн ажлаа дахин нэг эргэж харж, юу нь илүү үр дүнтэй байсан, юу нь үр дүн багатай даруй зогсоох хэрэгтэй байна гэдгийг ялгаж салгах.2: Үр дүн багатай даруй зогсоох шаардлагатай ажлын жагсаалтаа гаргаж, шинэ санаагаа хэрэгжүүлэхэд шаардлагатай цаг зав гаргаж ав.3: Дүн шинжилгээнд суурьласан шийдвэр гаргахад анхаар.4: Яг одоо л шинэ төлөвлөгөө гаргах дээр төвлөрч суу.5: Яг одооноос шинэ төлөвлөгөөгөө хэрэгжүүлэхэд хэрэгтэй шинэ ур чадвар, мэдлэг эзэмшихэд цаг гарга.

Энэ удаагийн дугаарт 2023 онд сошиал медиа маркетингийн чиг хандлагын талаарх мэргэжилтнүүдийн төсөөллийг нэгтгэн, товчхон гаргаж та бүхэнд хүргэж байна. Харин ирэх 7 хоногт энэ талаар дэлгэрэнгүй нийтлэл бэлтгэн хүргэх болно.

Манай энэ удаагийн санал асуулганд идэвхтэй оролцоорой. Бас үр дүнг нь хараарай.

Чиг хандлага

2023 он сошиал медиа хааш чиглэж байна?

2022 он сошиал медиа платформуудын хувьд бас л хүндхэн жил боллоо шүү. Зөвхөн Твиттерийн хувьд ч биш. Харин ирэх онд сошиал, интернэт орчин хааш чиглэж багаа бол?

Твиттер тийм ч амар алга болчихгүй байх!

Элон Маскд дуртай, дургүй байх талаарх асуудал биш. Тэгээд ч мань хүн Твиттерийг авсанаас хойш хийсэн өөрчлөлт бүхэн сайн сайхан зүйлс биш байсан гэдэгтэй санал нэг байна.

Гэхдээ л Twitter ойрын ирээдүйд нөлөө бүхий сошиал медиа суваг байх болно гэдэгт итгэлтэй байна.

Бусад бараг бүхий л сошиал медиа платформууд визуал контент дээр анхаарлаа төвлөрүүлж байгаагаас харахад ч тэр Твиттерийнхэнд очих өөр газар бараг л байхгүй дээ.

Түүнээс гадна мэдээллийн хурд, яг одоо болж буй зүйлсийн талаарх мэдээллийг Твиттер л хамгийн сайн хүргэж чаддаг.

Сайн ч бай, муу ч бай аль ч талаасаа Twitter харилцан яриа өрнүүлэх хамгийн тохиромжтой газар гэхэд болно.

Instagram TikTok-г хуулбарлахаа үргэлжлүүлнэ!

TikTok хэрэглэгчдийн уг аппд зарцуулдаг дундаж хугацаа Instagram-нхаас бараг 2 дахин их байдаг юм байна.

Шалтгаан нь "For You" хуудас нь. Контент санал болгох шинэлэг алгоритм ашиглан хэрэглэгчдийг бусад сошиал медиа сүлжээнүүдээс илүү урт хугацаанд ТикТок-д барьж чаддаг гэнэ.

Тэгэхээр ирэх жил Мета, ялангуяа Instagram санал болгох контентыг хэрэглэгчдэдээ хүргэх тал дээр илүү их хүчин чармайлт гаргах болов уу.

Инстаграм энэ оны эхээр санал болгох контентийг нэлээд идэвхтэй нэвтрүүлэх оролдлого хийсэн хэдий ч "Instagram-ыг буцаагаад Instagram болгоё" хөдөлгөөн нийтийг хамарсан давалгаа үүсгэснээр энэхүү оролдлогоо зогсоосон.

Instagram-н өөрчлөлт бүрийг биечлэн танилцуулдаг Гүйцэтгэх захирал Адам Моссери хэдийгээр уг оролдлогоо одоогоор зогсоосон байгаа ч Instagram алгоритмынхаа учрыг олсон үедээ дахин гаргаж ирэх болно хэмээн өөрийн биеэр мэдэгдсэн. Өөрөөр хэлбэл ирэх жил…

Анхаарал, Анхаарал, Анхаарал... Улам л чухал болж байна!

TikTok-с өмнө нь сошиал медиад органик хүртээмж гэдэг зүйл дагагчдын тоотой уялдаатай байлаа.

Харин одоо бүх юм өөрчлөгдсөн. Анхаарал татаж чадах гэдэг зүйл хамгаас чухал байсан бол ирэх жилүүдэд бүр л илүү чухал болж байх шиг байна шүү.

Зүгээр л сошиал медиа аппаа гүйлгээд үзэж суугаа хэн нэгэнд 3 секундын дотор л танай контентийг яагаад үргэлжлүүлэн үзэх ёстойг нь ойлгуулж чадахгүй бол тэднийг тэр чигт нь л алдана гэсэн үг.

Тэгэхээр анхаарлыг татах зүйлд хамгаас түрүүнд, хамгийн ихээр анхаарлаа хандуул, цаг, хүчээ зарцуул.

Шинэ технологи танай сошиал медиа маркетингт эрс өөрчлөлт авч ирэхгүй л болов уу!

Ирэх жилийн сошиал медиа маркетингийн нөхцөл байдлыг урьдчилан таамагласан хэд хэдэн нийтлэл уншиж үзсэн. NFT, AR, VR, Web3 болон Metaverse гэх мэт шинэ технологийн сошиал медиа маркетингт үзүүлэх нөлөөг хэт дөвийлгөсөн мэдээллүүд тийм ч итгэл төрүүлэхээр санагдаагүй.

Эдгээр шинэ технологи хүчтэй, үр дүнтэй нөлөө үзүүлж эхлэхэд хараахан бэлэн биш байгаа болов уу. Ихэнх хэрэглэгчид энэ талаарх ойлголт багатай хэвээр байгаа. Тэгэхээр миний хэлэх гээд байгаа зүйл юу вэ гэхээр ирэх онд хамгийн үр дүнтэй сошиал медиа маркетингийн контент нөгөө л видео, зураг, текст гэх мэт уламжлалт форматтайгаа л байх болов уу даа.

Сошиал орчинд шинэ технологийг ашиглах нь маркетингийн үр дүнтэй стратеги гэхээсээ PR-н хэрэгсэл л байх болов уу одоохондоо!

Таны хувьд чиг хандлага, шинэ томоохон ямар тренд, өөрчлөлт харагдаж байна? Санал бодлоо бидэнтэй хуваалцаарай.